Мәғариф бүлеге тарафынан Уҡытыусы һәм остаз йылына арналған «Белем һуҡмағы буйлап» тип аталған семинар-экскурсия ойошторолдо.

Билдәле яҡташыбыҙ,  Башҡортостандың халыҡ яҙыусыһы Таңсулпан Хизбулла ҡыҙы Ғарипова белем алған Түбә мәктәбенән уның тыуған Күсей ауылына тиклем юлды йәйәү үтеү, уның исемендәге кабинет-музей менән танышыу, түңәрәк өҫтәлдә аралашыу – проекттың төп маҡсаты.

Сарала  яҡташыбыҙ Ғарипова Т.Х., мәғариф бүлеге начальнигы вазифаһын башҡарыусы Ирмәков Ф.Р., Рәми Ғарипов исемендәге гимназия-интернаты директоры Сәлихов И.Р., Сибай гимназия-интернаты директоры Бикбова Р.Х., мәғариф ветераны Әхмәтова К.А., башҡорт теле һәм әҙәбиәте уҡытыусылары ҡатнашты.

Экскурсия Түбә мәктәбендә Т.Ғарипова исемендәге кабинет-музей менән танышыуҙан башланып китте, артабан ҡатнашыусылар Ирәндек тауҙары аша Күсей ауылына юлланды. Тәбиғәт ҡосағында урынлашҡан тирмәлә ҡатнашыусылар юлды  үткән ваҡытта кисергән хис-тойғолары, мажаралары менән уртаҡлашты, яҙыусыға һорауҙарын бирҙе. Сара Күсей мәктәбе бинаһында урынлашҡан беренсе ҡатын-ҡыҙ уҡытыусыһы Әсмә Баймырҙинаға арналған мемориаль таҡтаташҡа сәскә һалыу, мәктәп музейына сәйәхәт ҡылыу менән тамамланды.