"Урал батыр" эпосын башҡарыусы йәш сәсәндәрҙең XXIV республика конкурсы еңеүселәрен ҡотланылар.

  Мәжит Ғафури исемендәге Башҡорт дәүләт академия драма театрында "Урал батыр" эпосын башҡарыусы йәш сәсәндәрҙең XXIV республика конкурсы еңеүселәрен ҡотланылар. Бүләкләү тантанаһына республика этабы еңеүселәре һәм призерҙары килде. Башҡортостан Республикаһы дөйөм белем биреү ойошмаларынан 30-ҙан ашыу уҡыусы һәм фольклор коллективтары саҡырылған.

  2022 йылғы бәйгелә 25 район, 5 ҡала мәктәптәренән һәм 5 республика гимназия һәм лицейҙан 136 уҡыусы ҡатнашҡан. Сәсәндәр мәктәбен үҫтереүҙе, халҡыбыҙҙың тарихына һәм мәҙәниәтенә һаҡсыл мөнәсәбәт тәрбиәләүҙе, һәләтле балаларға ярҙам итеүҙе күҙ уңында тотҡан тәрән йөкмәткеле был конкурсты Башҡортостан Республикаһының Мәғариф һәм фән министрлығы ойоштороп килә.

   Быйылғы конкурс Рәсәй халыҡтарының мәҙәни мираҫы йылы һәм республикабыҙҙа иғлан ителгән Башҡорт мәҙәниәте һәм рухи мираҫ йылына арналғайны. Уҡыусыларҙы “Урал батыр” эпосы менән ҡыҙыҡһындырыу һәм бәйгенең мәртәбәһен үҫтереү өсөн мәғариф һәм фән министрлығы еңеүселәргә дипломдар, 3 меңдән алып 7 меңгә тиклем аҡсалата бүләк тә әҙерләгән ине.

   “Урал батыр” эпосын башҡарыусы йәш сәсәндәрҙең XXIV республика конкурсында беҙҙең район уҡыусылары ҙур уңыштарға өлгәште. Темәс мәктәбенең 4-се класс уҡыусыһы Ибраһимова Разалия (етәксеһе Ишбулатова С.Ш.),  Сәйғәфәр мәктәбенең 6-сы класс уҡыусыһы Солтанова Зөһрә (етәксеһе Ғәлина Н.Б.) «Урал батыр» эпосын ятлап, икәүһе лә I урынға лайыҡ булдылар.

    Уҡыусыларға һәм уларҙың етәкселәренә артабан да яңы үрҙәр, ҙур еңеүҙәр теләйбеҙ!